عايزه تشترى دبــــــل الفرح؟

معاد خطوبتك قرّب وخلاص كلها كام يوم وتنزلي تشتري الشبكة؟..

نفسك حد يساعدك؟ ويقولك على إيه الجديد في موضة الشبكة؟ وخصوصا موضة الدبل؛ لأن مفيش وقت إنك تنزلي وتلفي وتشوفي في المحلات إيه اللي نازل جديد..

تعالى اتفرجى معايا

بس قبل ماتشوفوا الموضه تعالوا اسمعوا النصحتين دول الاول

عايزه تشترى دبــــــل الفرح؟ 29725177

النصيحة الأولى
اتفقي مع خطيبك

يا ريت تقعدي مع خطيبك في اليوم اللي قبل ما تنزلوا تشتروا الشبكة، وتتكلمي معاه براحة وبهدوء شديد جدًّا..

وتسأليه -مثلاً- عن المبلغ اللي هو مستعد بيه للشبكة علشان لما تروحي تختاري تبقي تختاري في حدود المبلغ ده، ودي حاجة مش عيب، واوعي تزعلي لو قال لك على مبلغ بسيط؛ لأن الشبكة دي حاجة رمزية، وبكرة -إن شاء الله- يجيب لك حاجات تانية أحسن.

يا ريت برضه تتكلمي معاه، وتقولي له: إن دي حاجة بتاعتكم إنتم الاتنين، ولازم إنتم الاتنين تختاروها على ذوقكم مش على ذوق أي حد تاني، واطلبي منه إنه يفهّم "مامته" النقطة دي، وأنت كمان فهّمي "مامتك" النقطة دي.

النصيحة التانية
خليكِ ذوق

وإنتم في المحل اسأليه باستمرار إذا كان ده مناسب ولا لأ.. واحترمي اختياره وذوقه حتى لو اختار حاجة مش عجباكِ، حاولي ماتبينيش ده بشكل مباشر، وقولي له: الله.. حلو قوووي ذوقك، بس إيه رأيك في ده؟ أعتقد إنه أحلى!!!!

بس يا ستي..
دي كانت النصائح، وتعالي بقى نتعرف على الموضة

عايزه تشترى دبــــــل الفرح؟ 829615160

بالنسبة للدبلة

ه

وخدي بالك..
إنك بعد ما تختاري الدبلة تطلبي من الصايغ إنه يحفر عليها مثلاً أول حرف من اسمك، وأول حرف من اسم خطيبك، أو تاريخ الخطوبة أو تاريخ أول لقاء، وفيه حاجة تانية طالعة جديد، وهي إنك تكتبي على الدبل كلمة حب مثل "...To My Love". وتكتبي اسمه..

وعلى فكرة ممكن إن خطيبك يختار دبلته بنفس الشكل بتاع الدبلة بتاعتك.

الدبلة الماسية

والدبلة الماسية أو "المحبس" زي ما فيه ناس كتير بتقول عليه هو الإطار اللي بيحيط بالدبلة، وفيه منه أشكال كتير، علشان كده لازم تبقي ذكية، وتختاريه مناسب للدبلة، بحيث يبان هو والدبلة كأنهم شيء واحد..

فمثلاً

لو اختارتي دبلة دهب أصفر خالص يبقى لازم المحبس يكون دهب أصفر.

لكن لو الدبلة دهب أبيض يبقى اختاري المحبس هو كمان دهب أبيض، وابعدي نهائي عن الدهب الأصفر.

لو الدبلة دهب أصفر في أبيض يبقى في الحالة دي عندك حرية في الاختيار إنك تختاريه أصفر أو أبيض..

وخدي بالك كمان إن لو الدبلة عريضة يبقى يا ريت إنك تختاري المحبس رفيع، والعكس طبعًا لو الدبلة رفيعة يبقى اختاري المحبس عريض..

باقي الشبكة يا قمر

بالنسبة لباقي الشبكة فاختيارها بيرجع ليكي إنت، ولذوقك الشخصي وإمكانيتك المادية، فممكن إنك تختاريها عبارة عن

توينز:

وبيبقى عبارة عن الدبلة الماسية "المحبس" والخاتم بيكون بفص ماس ¼ قيراط، وعلى فكرة الماس فيه منه ألوان، فبجانب اللون الشفاف التقليدي برضه فيه ألوان تانية زي الوردي، الأصفر، الأزرق، البنفسجي، وكمان الفص فيه منه أشكال كتير زي المثلث، والمربع، والبيضاوي، والمستطيل..

وعلى فكرة تَمَن الماس بيحدده مقاييس محددة زي النقاء، طريقة القطع، اللون والقيراط.

طقم دهب كامل:

كمان ممكن إنك تختاري الشبكة عبارة عن طقم دهب كامل سواء دهب أبيض أو أصفر ..

توفّقي طقم:

وممكن إنك تختاري إنسيال وسلسلة وخاتم وحلق يكون شكلهم مناسب لبعض بحيث إنهم يبانوا كأنهم طقم واحد.

وقبل ما ننهي كلامنا
بنقول لكل البنات اللي على وش خطوبة أو زفاف: ألف مبروك، وعقبال باقي البنات..